చెన్నుగ వచ్చు నాయకులు చేతులు కట్టుకు నోట్లకోసమై
మిన్నును దెచ్చి యిత్తుమను మేలగు నాశలు చాల జూపుచున్
తిన్నగ గద్దెనెక్కగనె తీయని మాటలు నీటిమూటలై
యన్నమొ రామచంద్ర! యని యందరు చచ్చిన రామరాజ్యమే!!!
శుండియు శ్రీకాళమ్ములు
నిండుగ సద్భక్తి తోడ నిను సేవించన్
మెండగు ముక్తినొసంగిన
చండీశుడ వందనములు చల్లగ గనుమా !!!
సేమమగు గదా విద్యన్
భీముండు ప్రసిద్ధుఁడయ్యె , బిఱికితనమునన్
నీమము విడి యుత్తరుడా
భీమరమును వీడి తాను భీరుకుడయ్యెన్!!!
వింతగ మదిలో మెదిలెడి
మంతనముల నేరి కూర్చి మగనికి దెలుపన్
సంతసముగ నొక లేఖ శ
కుంతల లిఖియించు చుండె కూరిమి తోడన్!!!
మా సము లెవరని బలికెను
మీసమ్ములు లేని వనిత , మేదిని గలదే !
మీసము బెంచిన తొయ్యలి
భాసిలు వాల్జడ యె బెంచు భామకు చెలువున్!!!
మన్నును తిన లేదమ్మా
యన్నయె కల్లలను జెప్పె యనుచున్ నోటన్
నన్నియు జూపించిన యా
వెన్నుని గని తల్లి మనసు విస్మయ మందెన్!!!
పదునాలుగు లోకమ్ములు
విదితంబుగ నోట జూపు వెన్నుని గనుచున్
ముదముగ యశోద మ్రొక్కుచు
కదలిక గోల్పోయి దలచె కలయా! నిజమా !!!
ప్రజలు బుద్ధిమాలి ప్రల్లదమాడగా
ధరణిసుతకు గరిమ దగ్గు నయ్య?
నొప్పిదముగ నీవు కప్పురగంధిని
కానలతరలింప మాను రామ !!!
ప్రజలు బుధులు వచ్చి ప్రార్ధింప గాదని
దగ్గుమొగ్గు లేక తమ్ముడికను
నొప్పిదముగ ధరను నోముకొనుననుచు
కానల తరలెనుగ కపిరథుండు!!!
రారా ముకుంద! మాధవ!
రారా కృష్ణా! మనోభి రామా !యనుచున్
మీరా గానము జేయుచు
ద్వారక నాధుడిని జేరి తరియించెనుగా !!!
కనియగ నఖిలమ్మునకున్
మనికిని గల్గించు నతడె మాధవుడనుచున్
మనుపును గోరుచు వేడెడి
దనుజుల యిల వేల్పు చక్రధరుడగు హరియౌ!!!
వండి పెట్టెడి వేళ వంటింటి మహరాణి
. ….యన్నపూర్ణయె తాను హంసయాన
విద్యలందు నపుడు విజ్ఞాన ఖనియామె
. ……..పలుకుతొయ్యలి గాదె తలిరుబోడి
యిలను గెలిచి జూపు నే వృత్తి నందైన
. ….విజయలక్ష్మి యగును వెలది తాను
సంతసమ్ముగ తాను సంతానలక్ష్మియౌ
. …….కన్న సుతుల గాచు కలువకంటి
సవ్యసాచి వోలె సంధాన కర్తయౌ
నొక్క వనిత జేయు పెక్కు పనులు
నారు రూపులందు నలరారు రుచిరాంగి
యాదిశక్తి గాదె యవని యందు!!!
పండితభావము దెలియని
పండితు డెందులకు, పనికివచ్చు ధరిత్రిన్
పెండెరములు లేకున్నను
నిండుగ జనహితము గోరు నిజమగు పఠియే!!!
తెలుపు నలుపు కలగలిసిన తేనె కళ్ళ పిల్లిరా
తలుపు వెనక మాటు వేసి తపన తోడ నుండెరా
యెలుక కొరకు వేచి యుండె నింత లేసి కళ్ళతో
పలుక రించ పారి పోవు ప్రాణ మన్న తీపిరా !!!
పిల్లి పిల్ల పారికోయె వెదకు చున్న దొరకదే
లల్లి బెంచె ప్రేమ మీర రస్కు లేసి దానికిన్
చిల్లి గారె లివ్వ గానె చిందు లేసి యాడునే
కళ్ళ బడితె మీకు తాను కాస్త నాకు జెప్పరే !!!
రోజా లున్నవి ముళ్ళు లేక సభలోరూపించె మిథ్యాగతిన్
జాజుల్మల్లెలు జంటగా నచట సంజాతంబు గానుండె నా
యాజాబిల్లిని జూచి కల్వలుగదా యాహ్లాద మున్ విచ్చు నో
రాజా !పున్నమి రాత్రి పూచె సరసిన్ రాజీవముల్ చిత్రమై!!!
ప్రతి దినమున వేకువనే
నతులిడి బూజించవలయు నయముగ తులసిన్
వ్రతముగ గొలువగ నిటులన్
నతులిత బుణ్యంబు గలుగు నతివల కిలలో!!!
మతి నీయమనుచు సుతునికి
వెతలను కలిగించకెపుడు వేడుక లీయన్
గతియే నీవని దేవకి
సుతుపదముల వ్రాలి తండ్రి స్తుతు లొనరించెన్!!!
దుష్టుల నణచగ దేవకి
యష్టమ గర్భముగ బుట్టి హరిమేధుండే
సృష్టిని గావగ చెరవిడి
యిష్టముగ యశోద యొడిన యిమ్ముగ బెరిగెన్!!!
పుట్టిన బిడ్డను జూచుచు
నెట్టులొ మది దిట్టబరచి నిశిలో పతితో
బిట్టుగ పంపెను దేవకి
గుట్టుగ చెరసాలనుండి గోపాలుడినే!!!
ఆడి కారును దెచ్చిన కోడలనుచు
పెత్తనమ్మునుజేయక యత్తగారు
కమ్మ కమ్మగ నీయగ కాజు తోప
కోడి ,ని కరకర నమిలె కోడలమ్మ!!!
శ్వాస నీయంగ రేపటి యాశలకును
భూమి చీల్చుకు వచ్చెను బుజ్జి మొలక!
రక్కసుల నోట చిక్కక రమ్యముగను
జీవ మందిచుమా నీవు చిట్టి తల్లి!!!
కుంభ కర్ణుని మేల్కొల్ప కొలువు గాళ్ళు
పలు తెరంగుల యత్నించి భంగ పడిరి
తుదకు భోజనమును దెచ్చి మదిర జల్ల
బండ నిద్రను వదిలెనా గండరీడు !!!
